|
copyright doon veer neet aan. foto's
geklauwt bie tv valkeberg, danke loe geraads!
PRINS THEI
d'n IèRSJTE
Veer hubbe
binne oes Zaate Herriemenie dit joar wéér unne
prins!
Dit joar ies,
oet oes sexie tuba sexie, oeze tuba-sjpeler Thei prins gewoore van de CS de
Mirlitophile in oes Valkeberg!
Thei is
inmiddels al un aantal joar getrouwd mit Petra (lid van oes commité van
altieddoerende biesjtand, dit joar get minder altied doerend meh ahla) en haet
twiè kinger. Frans (lid van oes sexie saxe sexie) en Rosanne (auch lid van oes
commité van altieddoerende beisjtand). Hae wirrik, of beter gezach ies aanwezig,
bie un bedrief woavan veer de naam neet moage neume. Dat terzie.
Wiejer sjpeelt
hae bie de Hermenie Walram en voetbalt hae bie de voetbalclub Walram. Dit joar
zjweit hae de scepter euver 't Bokkeriek.
Hae weurt
hie-in biegesjtoon door ziene sjteun en toeverloat mit dees daag, ziene broor
(pap van oeze sexie saxefonis sexie-is Stefan) Minister Frans. Euver Frans
koeste veer neet veul miè informasie kriege, aangezeen hae lid ies van un ander
zaate hermenie binne 't Bokkeriek. Dan zou dat plagiaat beteikene en doa hauwte
veer oes neet gaer aan op.
Veer van de
Zaate Herriemenie hubbe oes toersjema van dit joar un bietsje aangepas
op 't toersjema van de prins. Meh aangezeen oeze secretaris/ veurzieter/
duitedeef, Lei (naefke van Thei en Frans en auch lid van oes sexie tromputte
sexie) neet wis of Thei auch nog jeugprins van Sjin, ex-prins van Suub, Minister
van Vilt of Nar van Voals zou weare dit joar hubbe veer waal un aantal reijene
opgesjreve waorum veer oeze Thei vollege dit joar mit de vastelaovend.
ten ièrsjte:
Umdat veer zoa
un toersjema gekrege hubbe en 't neet zellef hubbe hoave te bedinke.
ten twjède:
Zoa kinne veer
Thei dit joar good in de gate hauwe.
Veer zalle heum
vollege al geit 'r noa de weecee.
ten derde:
Zoa kinne veer
Petra(lid van oes commité van altieddoerende biesjtand) good in de gate hauwwe
dit joar.
ten veerde:
Es eemes dae
scepter klauwt kinne veer dae metein weer euver-klauwe.
ten viefde:
Veer motte
zeker d'r van zeen dat hae good begeleid weurt.
ten zisde:
Zoa maake veer
un groate kans op de TreuteBokaal dit joar.
ten zevende:
Es Thei un
rundje wilt geve en nemes dat zou wille, kinne veer 't veur heum opdrinke en
hoof hae 't beer neet weg te goaje.
ten achste:
Veer kinne Thei
zoa laote veule dat hae min of mjè onmisbaar ies.
ten neugende:
Veer kinne Thei
loate heùre dat hea waal min mjè onmisbaar ies.
ten tiènde:
Veer kinne Thei
loate zeen dat hae normaal allein es opvulling mitgeit.
ten illefde:
Veer kinne Thei
loate preuve wie sjoan 't ies um mit de vastelaovend mit un zaate hermenie te
viere.
tot sjlot:
Veer wunsje
Prins Thei, Petra, Fransje en Rosanne en natuurlik
Minister Frans,
Yasia, Stefan&Lillian, Franek, Irysia en Jiri
un geweldige
vastelaovend toe!
En veer
sjleete aaf mit oes eige nuuje motto van dit joar:
Al hubste af
en toe get minder goojje mood,
zit neet bie
de pakke neer want vastelaovend viere mit oeze Prins Thei, dat maak dich alles
wir good!
Onder de
orrizjinele teks oet oes verleeje.
Ut ontsjtoon
van de Zaate Herriemenie geit wied truuk nao ‘n duuster verleije:
Veer
sjrieve 15 fibberwari van ‘t jaor 1041 es ‘nne Duutsje keuning besjlis um ‘t
dörp Vallekeberg, euver te drage aan zien niesjeke. Dit meadsje, Irmgard geneump,
waor getrouwd mit ‘nne zekere Florquin. Florquin waor van beroep hoefsjmid, in
dae tied un respectvol beroep. Ziene klantekrink reikde tot aan “Sjnif an Sjweul”,
ut huidige Sjin op Geul. Toen Florquin en Irmgard hunne ièrsjte zoon, Archibald
geboore woord, verloort Irmgard haor intresse in Florquin en richde ziech allein
mer op Archibald.
De
romantiek waor wied te zeuke en Florquin zeukde zien heil in ander dinger. D’n
drank loag natuurlik veur de hand, meh dao neeve lag heer zich toe op ‘n
instrument dat hae gekrege houw van ‘nne zekere Theldag oet Sjwup, ut huidige
Suub. Volleges Theldag waor Florwuin ‘n ech natuurtalent op de Serpent, vaol
beter es Theldag zellef. ‘n professionele carrière waor veur Florquin helaas
neet weggelag, in verband mit zien gewoonte um veur ‘n optreije zien oonderbrook
links um te dreije in plaatsj van rechts um.
In
de driej daag veur de 40 daag vaste waor dit gein probleem en zörgde Florquin
dat dit eetfestijn woort opgeloesterd mit ‘n sjaon stuksjke Serpent-geluid. Dit
heat Florquin tot aan ziene doad volgehauwe en me zaet dat heer mit zien Serpent
al sjpelend is heen gegange. Gezeen de sjlechte relatie die Florquin mit ziene
zoon Archibald hauw, heat heer zien talent neet kinne euverbringe. ‘nne Tied van
sjtilte veel euver Vallekeberg.
De
vastelaovend woort waal gevierd en luuj höbbe geprobeerd um ‘t geluid dat
Florquin produceerde te evenaren, meh tevergaefs. ‘t Haet tot ‘t jaor 2003
gedoerd veurdat de werm klanke van Florquin weer in Vallekeberg te huere waore.
De Zaate Herriemenie trok door de sjtraote en geine miensj wies wat geboarde, op
‘nne zekere Theldag de 72e oet Sub nao………
Wilt
geer mjeh te weite kome euver ’t létste hoofsjtuk in dit muzikaal
geschiedenisbook en de luuij die hie verantwoordelik veur zeen. Klik dan gauw
wiejer……
't
serpent
Ps:
Höb geer mjeh info euver Florquin, Irmgard, Archibald of Theldag oet Sjwup. Mail
nao: info@dezaateherriemenie.nl
| 
.JPG){kind=link}